بقلم عماد كمال متولي مراد
ناس بِتلِف وناس بتدور
وناس بِتحَوَّر عالمِتحَوَّر
وناس فالحق ماتخشى تقول
وتقوله في وشك لو بيعور
وناس بتحابي عالمتحابي
وناس لوغني غلطان بتدادي
وناس بتطبطب عالمتطبطب
وناس للقوي بتبوس لِقْدَام
وناس بتنافق عندها عادي
بكل بجاحه ماتخشى ملام
وناس بتعافر بين لتنين
عايشينها مرار طفحينوا سنين
ماشيين بكرامه وعزة نفس
عايشين ع الصدفة مش أحلام
يومك يومك بس إنعيش
والأكل ساعات يبقى تناتيش
أطباق فاضية ورن معالق
وأصل السفره ملح وعيش
وناس مَاوائِدهُم طُولها امتار
و ناس حفلاتهم بالمليار
ولما الجار يكون مِحتاجهُم
يِعَلَّوا ما بينهم في الأسوار
و في بيدور ع المحتاج
و يوصل دارُه
دا إللي عايز في الأخره ياناس
يِعَمَّر دارُه
شوف وإختار لك واحد منهم
وإلبس توبة لعله يناسبك
يومها هتعرف معنى كلامي
لما المولى يجي يحاسبك
عمادكمال متولي مراد
أسيوط مركز الفتح
ليست هناك تعليقات:
إرسال تعليق