بقلم إبراهيم يونس
المواطن الغلبان ماشى وساخط على قدره
ويشوط فى الطوب يطلع دخان
بيفكر امتى يحس امان
رغم ان الناس والكون ضده
والدنيا بتسحبه من رجليه
وتحط عليه/وتزيد حرمان
كان شايل همه على كتافه
رغم ان الخوف كان بيخافه
كان هوا كمان بيخاف م الخوف
ويجسد وجعه فى شكل حروف
انسان مألوف شبهى وشبهك
مش يعنى هيفرق عنا كتير
كان بردو جدع ويحب الخير
وبيدى الناس رغم انه فقير
ومحدش كان فكر يديه
مش عايز احسان او صدقه
كان نفسه فى مشاعر صادقه
ويعيش فى بلاده بحريه
ويشوف اوطانه العربيه
متعاونه وكامله ومتحده
مش ناس بتموت من غير ديه
وسلطات اغبيه ونفوس جاحده
كان نفسه بجد فى حاجه واحده
لكن كان قسمته ونصيبه
يسيبه حبيبه فى عزله ووحده
زاد زهده فى كل الناس والكون
بقى بين العاقل والمجنون
بقى واحد جواه اتنين تانيين
بيخانقوا فى بعض ومش راضيين
يسيبوه للناس او للدنيا
كان ماشى وجاى م المستشفى
تشخيص الحاله
شيزوفرينيا!!!!
بقلم / ابراهيم يونس 😢😢
ماشاء الله يا فنان تسلم ايدك انت فعلا فنان متعدد المواهب اللهم لا حسد
ردحذفشكرا جزيلا لحضرتك تشرفت بمرورك العطر وحضوركم الكريم
حذف