عوني هشام و.........
________ ايمان ذهني
===============
.............. ايمان ذهني
اسمع بقه وبلاش معانده
وشوف إيه اللي عملته فيه
راح يفوت العمر لحظه
وانت سايق ف الأسيه
مره تغضب،،، ومره تهجر
ومره بايع القضية
هو إيه... ما فيش مشاعر
ولا حتى ب قلبي شاعر
اسمع بقه وبلاش معانده
وشوف ايه اللي عملته فيه
=================
................. عوني هشام
هو مين بدأ العناد
انتي ست مفتريه
لما كنا ف يوم بعاد
كنتى شغاله بأذيه
كنت اسامح كنت اداوى
هو كان دا دين عليا
كنت اغطيكى بمشاعر
وانتى بتزيدى الاسيه
الحياه بس بس تاخدي
برضه سيبي حبه ليا
==============
................ايمان ذهني
بحق العشره واللمة
وروح الخاله والعمه
وحق حروفي والضمه
ما ح قدر اقول ولا كلمة
بحق عيوني اللي عشقاك
وحق قلبي اللي داب ف هواك
ما ح قدر ابداً ف يوم أنساك
اسمع بقي وبلاش معانده
وشوف ايه اللي عملته فيه
================
................. عوني هشام
وجايه تحكى ع العشره
وعندى شهود بالعشره
بأني صاين العِشره
وماشفت معاكى حنيه
عيونك ما شافت غيرك
وقافله العش على طيرك
ماقلتش هاتي من خيرك
دا خيرى يكفى فوق ميه
الحياة مش بس رح تاخدى
دا يلزم برضه ملاغية
================
.................. ايمان ذهني
بحق الذكرى وحنيني
وقلبك اللي هاويني
وماضي جمعنا وسنيني
هترجع...... هترجع وانت شاريني
اسمع بقه وبلاش معانده
وشوف ايه اللي عملته فيه
=================
..................عوني هشام
ياريت عندك ولو ذكرى
لماضي عشته وياكي
خيالك راح على بكرا
وناسيه اليوم فى دنياكى
تعبت معاكى مش راجع
كفايه دمع فى عنيه
عمرى ضاع ومش شافع
حناني وضمه بايديا
ويا خساره اللى راح مني
بحنان زائف مع اسيه
===============
................... ايمان ذهني
يا اغلى من عمري وحياتي
يا كل املي وذكرياتي
يا شمس نهاري وزماني
معاك عيشت ايامي
وكل سنيني وغرامي
اسمع بقه وبلاش معانده
وشوف إيه اللي عملته فيه
==============
............. عوني هشام
انانيه ماليكي عزيز
هاقول لك باختصار ووجيز
طلباتك دى كات تعجيز
عشان تشمتى فيا
لا شفت معاكى ضو نهار
وخليتى حياتنا مرار
بافعالك خربتى الدار
كأنه شغل حراميه
يا ست سيبينى يوم ارتاح
كفايه عذاب كفايه جراح
خلاص اللي بينا اهو راح
بطيش منك وعصبيه
حياتنا كات شراكة اتنين
معدش مكان فيها ليا
معدش مكان فيها ليا
==============
................إيمان ذهني
حياتنا كانت باختيارنا
واختيارنا كان قرار
الفراق فيه دمارنا
والخراب عبى الديار
الغلط مش بس عندى
ما انت غيرت المسار
قلت لك كل اللى عندي
وكل ليل اخره نهار
انا مش جاريه يا افندى
ولا انت كنت شهريار
===============
مع تحيات عوني هشام
والاستاذه ايمان ذهنى
ليست هناك تعليقات:
إرسال تعليق