الشاعر احمد فتحي
بعد الصلاه ع النبي
والبعد ع الانجاس
نفتح بيبان سندسي
ع الحضره والقداس
ونقول كلام يتفهم
ماوردش ف الكراس
.........
الأوله قرطبه
بلد الهوى تكاعيب
والتانيه تعلبه
لابده فى غيط الديب
والتالته حسرتى
ع الفرقه والتعذيب
..........
الأوله قرطبه
طلقت يمام ف الفضا
يفرد شعاع للنور
فتحت بلاد مظلمه
وصلت بلاد حتحور
يامغرمين بالنبي
والقدس والعدرا
العمره فى الاندلس
والحج ف الحضره
دقى البيبان خبطى
ياام الشيلان خضره
لمى العيال ف الونس
جرح العيال م الفلس
فرش الطريق حسره
ياقبله العاشقين
والمغرمين باللوح
خطى الكلام وانقشى
كل الكلام مسموح
طول م الحمام بيطير
طول م الحرام مسفوح
لمى العيال جدفى
وارسي بسفينه نوح
على شط من جنسنا
مفرود بحنيه
ومتخافيش م الطوفان
أصل الطوفان ميه
بس الشيطان وزها
وز الشيطان غيه
ياام العيون شبابيك
فاتحه ع الجنه
يامهره من حسنها
كل الحمام غنا
مسموح ازور النبي
ولا النبي مشغول
تأشيره لجل النبي
قبل الهلال مايهل
فرد اترمى ع العتب
ضمينى زى الكل
ولا الجراح خلتك
تسقينى طعم الذل
......................
والتانيه تعلبه
بتبخ ف سمومها
شايله الكتاب مصلحه
تفصيله لهدومها
غريبه عن طبعنا
ولئيمه من يومها
لمت افاعى الحي
واتمددت ف جحور
القلب اسود غطيس
والوش شاعع نور
الراعي كلب خسيس
ساحب قطيع مأجور
وقت اما جانا الفرج
قطعم علينا النور
وصادونا فى العتمه
و الضرب كان تشريد
صرخوا العيال م الوجع
ياخلق بينا شهيد
وانبْح صوت العيال
صوت الافاعى يزيد
لكنه كان وسطهم
ولد على كيفنا
طبطب على قلبنا
أمنًا من خوفنا
صبح الولد مدفع
لما انكسر سيفنا
لموا الافاعى الغنم
ورموها غيط الديب
واشتدت المعركه
بالنهش والتحطيب
عملوم عمايل عجب
لكنه كان واعى
قال للعيال ف الحى
هاحميها بدراعى
لهف الولا النبوت
طايح ف غربانهم
الضربه ضربه موت
بتقص ابدانهم
يافتوة الحرافيش
ياعدو للانجاس
عشق الوطن بيعيش
ع الصدق فى الانفاس
صبحوا العيال هايمين
فى الحضره والقداس
والزفه زفه ولى
راكب على فرسه
كل الأفاعى تحوم
والانبيا حرسه
وعروسته ست الحور
فى الاصل جنيه
باين عليها النور
فى الذكر محميه
واللى يموت بالخيانه
من امتى له ديه
...................
والتالته من حسرتى
على توب يساع الكل
أبيض حرير مغربي
والغرزه كانت ضل
ضلل على اللى استووا
م القهر او م الذل
طلق الخطاوى أمل
فرش الحوارى فل
ولما طاب واستوى
اتنازعوا ع المحصول
فيه ناس هدفها النوى
وناس هدفها القول
وناس تقول متهم
وناس تقول مقتول
والتوب براحه عجب
طارح غيطان نوار
فاتح بيبان المدد
للحضره والاذكار
مجذوب رماه الهوى
لف البلد سواح
طرح الهوى سنبله
حبلانه بالارواح
ارواح بلون النوى
فيها العبير فواح
فيها اللى مات مرمرى
وفيها اللى عاش مداح
.......................
قصر الكلام -مقصده -
والعبره م التوضيح
الفسل ايه يصلبه
غير جودة التلقيح
وان طاب وطرحه استوى
ينزل رطب مجاريح
تاكله العيال تتصلب
ويصد عودها الريح
أحمد فتحى الكويت ٢٠٢١/٤/٢ ١٠ م
ليست هناك تعليقات:
إرسال تعليق